Чӑваш Республикинчи Муркаш районӗнче 177 ял. Патаккасси ялӗ Оринин ял уйрӑмне кӗрет. Ялта 2024 султа строительство ӗсне тытаннӑ хуҫалӑхсемпе тата учрежденисемпе пӗрле 78 кил-ҫурт шутланать. Патаккасси тесен нумайӑшӗ «патак» сӑмахпа ҫыхӑнтарать. Пирӗн тӑрӑхра ҫавӑн евӗрлӗ ятсем татах пур: Вӑрманкас, Ҫатракасси, Йӳҫкасси, Ҫӗмӗртлӗх тата ыттисем те.
Л.П. Сергеев, Н.В. Никольский ӑсчахсем тӗпченӗ тӑрӑх, ял ячӗ авалхи чӑвашсен арсын ячӗпе ҫыхӑннӑ. Ку ят Падек, Падик ятсенчен пулса кайнӑ.
Архивра 1737 ҫулта Оринин ялӗнчи хресченсен списокӗнче 91 хресчен. Вӗсен хушшинче Илья Падакин, Поттей Падаков ячӗсем пур.
Н.В. Никольский «Этнографические заметки о чувашах Казанской губернии» ӗҫӗнче (1911 ҫ.) ҫапла ҫырать: «К Малой Оринине приписываются селения: с. Оринино, д. Синьял, Молгачкасы, Лапкасы, Ганькино, Чамыши, Падаккасы, Вурманкасы, Пикикасы, Басурманы. Деревня Падаккасы считается родственной… Иногда всю совокупность деревень называли Тотарань… Лет 70-80 назад считалось неудобным брать невест из Падаккасов, ровно как выдавать своих дочерей за падаккасинских женихов».
Ҫапла вара Патаккасси Оринин ялӗнчен уйрӑлса тухнине ҫак икӗ тӗслӗх ҫирӗплетсе парать.
«Ял кунӗ» уявра ял аваллӑхӗ, хальхи ял пурнӑҫӗ ҫинчен кӗнеке пичетлесе кӑларма йышӑннӑ. Комисси ушкӑнне ҫаксене ҫирӗплетнӗ: Б.В. Мокшанов — ял старости, Ю.А. Иванов — учрежденисен историне ҫыраканӗ. Ялти кашни хуҫалӑх пирки ыйтса пӗлсе ҫырма анкетчиксене уйӑрнӑ: Тӗп урампа — Р.Л. Мокшанова, Симӗс урампа — Л.И. Федотова, Ҫӗнӗ урампа — Л.Л. Налимова, Ҫамрӑксен урамӗпе — Ф.П. Александрова, Н.В. Иванова. Пухӑннӑ материала йӗркелеме, ял аваллӑхӗ ҫинчен архив докуменчӗсене тата ватӑ ҫынсем аса илнисене ҫырма Р.В. Иванова пенсионеркӑна шанса панӑ.
Ку кӗнекери мифсем, архив докуменчӗсем, aca илӳсем, сӑнукерчӗксем, юрӑсем, хаҫат материалӗсем вулакана Патаккасси аваллӑхӗпе хальхи пурнӑҫне танлаштарса пӑхма май парӗҫ.
Кӗнеке вулакана ял илемне, ял тирпейлӗхне упрама, ялта пӗр-пӗрне хисеплесе пурӑнма кирлине аса илтерсе тӑрасса кӗнекене хатӗрлекенсем шанаҫҫӗ.
«Савнӑ ял – Патаккасси» кӑларӑма Муркаш тӑрӑхӗнчи ялӗн историйӗ, аталанӑвӗ, ялти ҫынсен кун-ҫулӗ, хисеплӗ ватӑсен аса илӗвӗсем, вӑрҫӑ паттарӗсем ҫинчен каласа панисем кӗнӗ. Кӗнекене хатӗрлекенӗсем: Александрова Фаина Петровна, Иванова Нелли Валериановна, Иванова Раиса Васильевна, Иванов Юрий Александрович, Налимова Любовь Леонидовна, Мокшанов Борис Васильевич, Мокшанова Римма Лазаревна, Федотова Лилия Ильинична.
